#Khutbah I
Ma’asyiral Muslimin wal Muslimat rahimakumullah,
Ungkapan rassa syokkor ampon sapatotta epajharnak kalaban mator Alhamdulillah, amargha kantos saat samangken badhan kaula sadhaja tettep bisa arasa’agin paparengepon guste Allah. Langkong-langkong se aropa kasempatan tapangghina badhan kaula sadhaja kalaban tellasan Idul Adha taon 1443 H ka’dinto. Samoga sadhajana kadinto dadiya panyamangat ka’angguy ningkattagin tor masēkkēn iman tor katako’an badhan kaula sadhaja da’ ka ajunanepon guste Allah SWT.
Ma’asyiral Muslimin wal Muslimat rahimakumullah
Idul adha aropa’agin salah setong are tellasan dalem Islam se aganduk kadaddhiyan se sanget kalonta e bhumi ka’dintoh. Se ka’dimma kadaddhiyan ka’dinto da’ bingkeng e abadikan dalem setong rangkaian ‘ibada. Duwa’ ‘ibada se ahubungan kalaban idul adha enggi ka’dintoh, ‘ibada kurban sareng ‘ibada ajjhi (hajji). Duwa’ ‘ibada ka’dinto aganduk kasēkkēnnan tor kaimanan se daddhi bhukte pangorbanan se edasare kalaban rasa ikhlas tor kasabaran se onggu-onggu.
Hadiriin jama’ah Idul Adha rahimakumullah
‘Ibada hajji aropa’agin kawajiban da’ ka badhan kaula sadhaja se andik kamampuan. Hal ka’dintoh etegessaghi sareng Allah dalem surat Ali Imran ayat 97:
Arteepon: “Alakoni hajji menangka kawajibnan manussa da’ ka Allah, enggi ka’dintoh (mongghu) oreng se sangghup alaksana’agi parjalanan ka Baitullah. Pasera bisaos amongkere (kawajiban hajji), maka saongghuna Allah Maha Kaya dari alam tor essena”.
Kamampuan alaksanaaghin rukun islam se nomer lima’ ka’dinto aghanduk arte siap kaangguy ngorbannaghi arta se ekaandik, menangka wujud syokkor atas nikmat arta tor kasehatan kaangguy manyemmak da’ ka Allah Swt..
Kasiapan badhan kaula sadhaja ngorbanagi arta kaangguy daddhi tamuyya Allah e Baitullah jughan ngajaragi da’ badhan kaula sadhaja kaangguy ajauhi sifat cerre’ tor lebut ka dunnya. Pangorbanan badhan kaula sadhaja dalam alaksanagi ‘ibada hajji jughan ngajarragi da’ badhan kaula sadhaja kaangguy tak agak-banggaagi kasoghiyan otaba epon kalebbiyan se e ka’andik badhan kaula sadhaja karana saestona sadjana menangka paparengepon Allah SWT.
Akadhi se sekaoningi badhan kaula sadhaja, parjalanan hajji elakoni kalaban arombongan dalam setong parjalanan se posa’ kalaban tantangan, ka malaradhan tor pangorbanan. Sarengan jugan parlo edhasare kalaban semangat se tengghi tor tak kenal putus asa esarengen kalaban sikap displin tor kasabaran kaangguy dapak ka tojjhuwan.
Akhlaqul Karimah da’ ka same manossana parlo jugan e paka’ada’. Kalaban niat se sepak, ‘ibada hajji kodhu bisa maodik semangat tor kasadaran aba’ kaangguy saleng maemot dalem kasaean, saleng anasehat dalam kasabbharan, tor saleng niser ka sadhaja mahlukkepon Allah SWT.
Ma’asyiral Muslimin wal Muslimat rahimakumullah,
‘Ibada hajji jugan aropa’agin bhukte katakwaan tor torok ocakna badhan kaula sadhaja da’ ka pakonepon Allah SWT. ‘Ibada hajji baktoepon ampon etantoaghi kalaban arte usah adingghal kalakoan se bhangsa kadunnya’an nyopre langkong nyittongnga a ’ibada kaangghuy kapentingan akherat.
Dhalem ‘ibada hajji, sadhaja jamaah hajji ngalakone runtudhan ‘ibada menangka usaha ka’angguy aberse’en aba’ dari dhusa sarengan jughan rep-ngarep pangapora, bellas-aseh tor rahmattepon Allah SWT.
Jamaah hajji jugan alateh kasabbharan kalaban kadisiplinan dalem alaksanaaghi runtudhanna ‘ibada hajji tor jughan aloppa’agin urusan kadunyaan sekadimma nyak-benya’na adaddhiyaghi ate loppa da’ ka Allah Swt.
Kalaban kalambi ihram se abharna poteh, jamaah hajji eajek emot da’ ka labun poteh se eangguy mayyit seka’dimma mate paste tebha da’ ka sadhaja se anyaba. Badhan kaula sadhaja ecepta sareng Allah tor bhakal abhali ka Allah. Tor paste apesah kalaban sadhaja se ekaleburi tor jugan apesah kalaban sadhaja se lebur ka aba’. Sadhaja bakal abali ka Allah.
E dhalem tawaf jamaah hajji aleng-lengen ka’bah pettong kale (7 x), ajigjig dari Shafa ka Marwah se kasebbhut kalaban Sa’i. Tawaf tor Sa’i agandhuk makna jha’ badhan kaula sadhaja parlo teros usaha ngaolle kamulja’an kalaban e dhasare tawakkal. Kalaban teros aberse’en ateh dari sefat se juba’ badhan kaula sadhaja kodhu nanceppagi tekad ka’angguy dapa’ ka puncak kasoccean.
Ma’asyiral Muslimin wal Muslimat rahimakumullah,
Allah SWT ajanjhiyagin soargha da’ ka oreng islam se alakoni hajji se edhasare niat murni karena Allah tor bisa ngaolle predikat mabrur
Artena: hajji se mabrur tadhak balasan monggu hajji mabrur angeng soarga (HR. Nasa’i).
Ponapa semaksod hajji mabrur? Hajji mabrur enggi ka’dintoh hajji se tak ecampore kamaksiatan. Hal ka’dinto sasuai kalaban makna “al-mabrur” se epondut dari oca’ al-birr se aghadhuwan arte kataatan. Makso epon hajji mabrur enggi ka’dintoh hajji se elaksanaagi kalaban edasari kataatan sareng tak ecapmor kalaban dhusa. Hajji mabrur jugan menangka hajji se etarema sareng Allah tor bakal ngaolle balessan al-birr (kabhaghusan), enggi ka’dinto ghanjharan.
Tatenger Hajji mabrur biasa epon epanggi dhari oreng kaoladhan langkong sae katembhang sabeluna alaksanaagi hajji tor tak ngolangi kalakoan maksiat tor dhusa se perna elakoni.
Sekeng bingkeng ngireng badhan kaula sadhaja a du’a da’ ka Allah samoga sadhaja ‘ibada se elakoni bakal ngaolle ridha epon Allah Swt. Ya Allah, ya Rahman dadiyagi abdina sadhaja kaangguy dapak Mekkah Madinah kaangguy alaksanagi ‘ibada hajji. Parengagin ka abdina sadhaja hajji se mabrur. Amin
#Khutbah II
-
- Diterjemahkan dari website NU Online
- Penyusun: Muhammad Faizin (Wakil Sekretaris PCNU Kabupaten Pringsewu)
- Judul Asli: Khutbah Idul Adha: Mengurai Makna Ibadah Kurban dan Haji
- Alih Bahasa: Tim LTMNU PCNU Sumenep.
- File khutbah di atas dalam bentuk PDF ukuran A4, klik tombol di bawah ini.
