Khutbah I
Allahu Akbar, wa lillahil hamd
Tellasan ka’dinto biasa epon etandai kalaban rasa gumbira seterjadi eman-ka’dimman tempat. Soara takbir epearsa e malam are tellasan, torkadang jùgân elaksanaagi takbir keliling. E baja lagguh ummat islam ngagem rasokan serba anyar, banyak daaran sae eseapagin tor siap asilaturahmi da’ sadâjâ bâlâ tor tatanggâ. Sabagian jugân, bada se arekreasi ka tempat-tempat hiburan.
Seggùt epearsa sareng bâdân kaule sadâjâ, oreng Islam e are tellasan parepaen “araya’aghi are kamennangan”. Nangeng tak ngagâli, mennang dari ponapa se emaksod?
Jamaah Sholat Ied Hafidakumullah…
Tellasan Idul fitri tebâ sa’amponna ummat Islam alaksana’agin poasa wajib sabulan bènteng e bulan Ramadhan. Sabulan bènteng oreng kasebbùt nahan lapar, pelka’ tor hal laen se mabâttal poasa mulae dari ngombâr pajjâr kantos compettâ are. Metorot bhasa epon, Shaum (poasa) andik makna sesame sareng oca’ Imsak se gâdùwan arte nahan. Bulan ramadhan aropaagin alat kangguy alateh nahan aba’ dari sadâjâ semabâttal poasa tor gùdâ’ân- gùdâ’ân laen epon.
Bukte lateyan kasebbùt aropa’agin larangan atas parkara seasal epon halal daddi haram, akadhì adâ’âr tor ngenum. Ka’dinto menangka inti dari tahapan alateh aba’. Seka’dimma maksod epon enggi ka’dinto, manabi ummat Islam dari barang se halal saos ampon bisa ngekker tor nahan ponapa pole dari barang tor kalakoan se haram. Poasaan ka’dinto akadhìya “Ujian Pelulusan” mongguh nak-kanak mored. Sabulan bènteng egembleng, elateh kanggùy ajâr onggù-onggù, ngorange bakto amaen, olle bisa lulus ujian tor bisa ajauhi parkara-parkara se bisa ngorangi kasamporna’an epon nilai ujian.
Ramadhan tanto bisaos lebbi dari sakadâr lateyan. Nangeng, menangka proses nyetak aba’ e bakto etotta’na rahmat epon guste Allah, pangaporana Allah, tor salameddâ dari apoy naraka. Sadâjâ kalakoan egânjar akadhì gânjârân ibadah fardu. Ibadah fardu ganjaran epon ekel-tekel.
Akadiya mored se asakolah, biasa epon bâdì narema rapot saamponna alastareagin ujian, saka’dinto jugân oreng Islam se alaksana’agin poasa. Samponna ngalebadìn bakto istijabah tor istimewa sabulan bènteng, ummat Islam jùgân berhak ngaolle hasel epon.
Ponapa hasil epon? Jawaban epon tak laen enggi ka’dinto predikat “takwa” akadhì se edabuagin Allah Swt e sorat al-Baqarah ayat 183:
“Ey oreng-oreng se padha iman, ewajibagi atas bekna apoasa akadi ewajibagin jùgân atas oreng-oreng sabelunna bekna sopaja bekna dadi oreng se takwa”
Takwa aropa’agin tingkatan paleng tenggìna dârajât kamuljâ’ân manussa. Tenggì mandâppa dârajâtta manossa etantoagin sareng tenggì buntena dârajât ketakwaan epon.
E Dalam masalah poasa Ramadhan, tanto saos takwa tak bisa ekaole kalaban namung nahan lapar tor pelka’. Bada hal laen se lebih penting kangguy etahan, enggi ka’dintoh ketergantungan manossa da’ salaen epon Allah, tamasok edalem hal kakdinto hawa napso.
Oreng seapoasa kalaban onggù-onggù apoasa paste nahan abâ’na dari sadâjâ kalakoan se jubâ’ akadhì noroten napso, lecek, arasanan, aremeagin oreng laen, riya’, nyake’e pihak laen, tor laen epon. Manabi tak saka’dintoh, poasa badân kaule sah monggù fiqih, nangeng tak nanto anilai e ajunan epon Allah subhanahu wata’ala. Rasulullah perna adâbu
Searte epon: “Banyak oreng seapoasa, nangeng tak ngaolle pan-ponapan dari poasana salaenna rassa lapar” (HR Imam Ahmad).
Jamaah shalat Idul Fitri hafidhakumullah,
Sahubungan kalaban Poasaan se ampon kalebat tor sobungnga jaminan bâkal tapanggi pole sareng ramadhan taon dateng, hal se paleng pantes ekagâli enggi ka’dinto, “Mennang atas ponapa e are idul fitri?” tor jugân ponapa tatengnger badân kaule sadâjâ ampon ngaolle kamenangan?” Nauzubillah, manabi bâdân kaule sadâjâ masok ka golongan oreng senamung ngaole pelka’ tor lapar, tanpa gânjârân?
Manabi dârajât se paling tenggì ka’dinto takwa, maka tatengnger epon jha’ saonggùna bâdân kaule masok ka golongan oreng sukses alebadìn Ramadhan tak bisa epesa sareng tatengnger epon oreng-oreng se muttaqin (oreng-oreng se takwa). Sajan tenggì dârajât ketakwaan bâdân kaule sadâjâ, menangka tatengnger jùgân tenggina kasuksesan poasa bâdân kaule sadâjâ.
Saka’dinto jùgân sabâliggâ, sajan sakonik dârajâttâ katakwa’an dalem bâdân kaule sadâjâ, nandâ’agin gagalla bâdân kaule sadâjâ sabulân bènteng e bulan Ramadhan. Ponapa bisaos tatengnger oreng-oreng takwa? Bannyak ayat se ajarba’agin tatengnger epon oreng takwa. Salah settong epon dalam Surat Ali Imran:
“Enggi ka’dinto oreng-oreng se anafka’agin arta epon e bakto senang tor jùgân e bakto sossah, tor oreng-oreng se nahan sefat ngusok tor nyapora atas kasala’anna oreng laen. Allah seneng da’ oreng se abâdhi kabâgùsân” (QS. Ali Imran: 134).
Jamaah shalat Idul Fitri hafidhakumullah,
Ayat kasebbùt ajharba’agi tello’ tatengnger epon se daddi tatengngerra oreng takwa. Se kapeng settong, senneng asadakah sabagian artanah dalem kabada’an senneng otaba epon sossa. Oreng setakwa tak emo’ namung mekeren aba’na dibik. Andik sifat sosial, arassa niser da’ sesama, tor lebur akorban munggù oreng laen dalem kabada’an ponapa bisaos. Bahkan, tak namung senneng apareng ka oreng seekasennengngin, namung jùgân da’ oreng se ngabuto’agin.
Dalem masalah Ramadhan tor Idul Fitri, tatengngera takwa se nomor settong ka’dinto saestona ampon edorong sareng Islam lebat ibadah zakat fitrah. Zakat fitrah menangka tandâ jha’ saongguna “rapor kalulusan” poasa kodù etandâi kalaban ngorbannagin sabagian arta epon tor andik rassa peduli da’ oreng laen se lemah. Ayat kasebbùt agùna’agi fi’il mudari’ yunfiqûna segâdùwan makna kagiatan ka’dinto elaksana’agin saterossa kalaban istiqamah. Pramila dari kadintoh, bisa efahami jha’ saonggùna zakat fitrah namung “pancengan” atas sadâjâ kepedulian sosial se tak tos-potos e bulan-bulan laenna.
Tatengnger sekapeng dua, oreng se takwa ka’dinto mampu ajâgâ rassa ngusok. Ngusok menangka sifat kamanossaan, “gejala manusiawi”. Namung oreng-oreng se takwa tak bâkal alombâr sefat ngosok sarombanan. Al-kâdhim (oreng senahan) settong makna kalaban al-kadhîmah (termos). Kaduana andik fungsi abendung: senomer settong abendung amarah otabha ngusok, se nomer duwa’ abendung aeng panas. Akadhìya termos, oreng se takwa samastena mampu nyimpen panas e dadana saenggâna oreng-oreng e seddìkna tak oning jha’ parepa’en ngusok. Bani keng tak ngusok, nangeng ketakwaan epon alarang kaangguy ngusok karena oning da’ mudarat se bâkal ekaolle.
Termos namung nottak aeng panas e bakto jelas maslahat epon, tor leres-leres ebùto’agin. Pantes saos e kesempatan lebaran ka’dintoh, ummat Islam ajaga emosina sabagùs mungkin. nyeggâh amarah otabha ngusok ngoasaen aba’na, tor asikap da’ ka oreng-oreng se pernah adadiyagin ngusok kalaban wajar tor biasa saos. Ramadhan saestona ampon alateh oreng kangguy malapang dada, bijaksana, tor tettep cellep ngadèppi situasi se panas.
Tatengnger sekapeng tello’, oreng se takwa enggi ka’dinto nyapora kasala’anna oreng laen. Sabulan Ramadhan, ummat Islam eanjurragin mabannyak parnyo’onan pangapora da’ ka Allah kalaban maos :
“Duh Allah, Ajunan dzat se Maha nyapora, seneng da’ ka oreng se minta pangapora, saporaagi abdina.”
Oca’ ‘afwun (sapora) eulang tello’ kale dalam dùwa kasebbùt, anandâ’agin jha’ saonggùna manossa anyo’on sapora kalaban onggù- onggù dari Allah SWT. Nyo’on sapora menangka bùkte sikap andhap ashor e ajunan epon Allah Swt menangka kabula se bannyak kasala’an tor tak socceh. Cara ka’dinto, manabi epraktikkagin kalaban penuh penghayatan, saongguna bisa alateh oreng selama Ramadhan tentang pentingnga sapora.
Manabi dari bâdân kaule dibik saos tak mungkin socce dari kasala’an, alasan ponapa se bisa bâdân kaule tak bisa nyapora kasala’an oreng laen? Sapora, aropaagin parkara se singkat tor panda’ nangeng bisa ekarassa sanget berra’ amargâ persoalan ego, gengsi, tor unsur-unsur nafso laenna. Onggu bijaksana ulama-ulama e Indonesia se abadì lalampan silaturahim tor saleng nyapora e momen lebaran otabaepon tellasan. Samporna ampon, nalekana bâdân kaula lastare aberse’en aba’ dari kasala’an-kasala’an da’ ka Allah, saterros epon bâdân kaule sadâjâ saleng nyo’on sapora atas kasala’an dhibi’ sebang menangka manussa. Ampon saponapa kale poasa bâdân kaule lebadhin saomor odi’? ponapa tatengnger suksessa Ramadhan kasebbùt ampon eka’andi’ badan kaule sadâjâ? Wallahu a’lam bish shawab.
Khutbah II
-
- Diterjemahkan dari website NU Online
- Penyusun: Alif Budi Luhur.
- Judul Asli: Khutbah Idul Fitri: Tiga Ciri Sukses Ramadhan di Momen Lebaran
- Alih Bahasa: Tim LTMNU PCNU Sumenep.
- File khutbah di atas dalam bentuk PDF ukuran Folio, klik tombol di bawah ini.
