Khutbah Gerhana Bulan Bahasa Madura: Gharana Bulan Tandha Kakobasa’enna Allah SWT

#Khutbah I

Maasyiral Muslimin rahimakumullah,

Ajunan sadhaja se emuljaaghi Allah Swt. Alhamdulillah dalem kasempatan se barakah kakdinto abdhina sareng ajunan sadhaja bisa akompol e masjid kakdinto dalem rangka alaksana’agi salah settong ibadah sunnah se sanget ekokoaghi dalem aghama se aropa shalat khusuful qamar (Gerhana Bulan) se cepon oreng madhura esebbhut kalaban gharana bulan otaba gherra’an bulan.

Para Muslimin Muslimat rahimakumullah, 

Dhimin banyak oreng andik kayakinan jhak saongghuna gharana otaba gherra’an, sae gharanah bulan se esebbhut kalaban khusuful qamar otaba gharanah are se esebbhut kalaban kusufus syamsi karena bada raksasa / landau se ngakan bulan otaba are. Dari kakdinto maka reng-oreng pas nabbhu tong-tong otaba perreng enalekanah gharanah lantaran terro ko’-matako’a tor nguja landaur kasebbhut.

Manabi ka reng-oreng Quraisy e Arab jaman dhimin, gharanah kakdinto ekaettaghi kalaban settong kadaddhiyan khusus, akadhiya bada’a se sedha otaba bada’a se arembi’. Kayakinan kakdinto terros eghabay tegghu’an dari wakto ka waktu saengghana daddi kayakinan umum e masyarakat zaman kakdissa’.

E zaman Rasulullah Saw. Enalekanah gharanah are asarengan kalaban sadhana potraepon Rasulullah Saw. se nganghungi asma Ibrahim, sabagian oreng lagghik andik anggheppan jhak saongghuna badanah gharanah are se kasebbhut karana sedhana potraepon Rasulullah Saw.

Kayakinan masyarakat umum kadhiye se ampon abdhina matorraghi, kakdinto karana sakonikna pangaoningan masyarakat edalem elmo alam, khusussepon masalah bhumi, bulan tor mata-are.

Dalem Islam, badanah gharanah kakdinto aropa’aghi salah sittung tanda kakobasa’anna Allah se Maha Aghung. Rasulullah Saw. adhabu e dalem sittung hadits se eriwayattaghi sareng Imam Bukhari

Arteepon: “Saongghuna (garana) are tor bulan kaduana banni karana bada oreng sedha otaba karana oreng lahira. Namung kaduana aropa’aghi settong tandha dari tandha-tandha kakobasa’anna Allah Swt. Saengghana lamun sampean sadhaja nangale ka kaduawana (gharana are otaba bulan), maka ashalata sampean kabbhi”. (Shahih Bukhari, 1042).

Dalam hadits kakdinto ampon etegghessaghi jhak saongghuna sobung kaetan sama sakale antara gharana sareng sedhana otaba lahirra oreng. Sae kakdinto oreng biasa otaba oreng se mulja. Namung badana gharanah kakdinto aropa’aghi settong tandha dari bannyak tandha kakobasa’anna Allah Swt se aropa’aghi dzat se nyipta alam tor essenah. Badana alam tor essena se tak abhentoran jhughan daddhi tandha jhak kakdinto bada se ngator jhalan bang-sebangnga. Pasera se ngator? Maka sobung karaguan poleh, se ngator kakdinto panika Allah Swt.

Sadhaja alam tor essenah kakdinto ajhalan e dalem jhalanna bang-sebang se dalem settong wakto bulan kakdinto bisa paddhang kalaban samporna se caepon abdhina sareng ajunan e sebbhut kalaban bulan pornama, namung e wakto laen namung saseba’, tor e wakto laen bulan kakdinto tak etangale sama sakale anging bintang se bada.

Akadhiye malem kakdinto, karana bulan, bhumi tor mata-are bada e settong gharis loros, tor bulan kakdinto katotopan bhumi dari mata-are saengghana bulan kakdinto paddhang namung celleng calemodhan. Hal kakdinto se esebbhut kalaban gharana bulan. Namung enalekanah mata-are, bulan tor bhumi bada e settong gharis loros, tor mata-are katotopan bulan maka kabadaan se kadhi kakdinto daddhi se settong kabadaan se ekenal kalaban gharanah are.

Jamaah Shalat Khusuf rahimakumullah,

Gharana aropa’aghi settong kadaddhiyan se luar biasa se nyalendha dari kapra. Hal kakdinto jhughan Allah Swt se ngator. Maka dari kakdinto bisa epondhut pangarteyan jhak saongghuna Allah Swt kakdinto kobasa atas sadhaja hal. Akadhiya ma paddhang bulan, ma petteng bulan, ma tera’ mata-are tor ma petteng mata-are tor kadaddhiyan-kadaddhiyan laen se bisa abdhina sareng ajunan pangghi’i dalem kaodi’an kakdinto.

Mila dari kakdinto, maka nyaktena badana gharana bulan bisa daddi pamekkeran da’ abdhina sareng ajunan sadhaja jhak kakobasaanna Allah kakdinto tanpa bates. Manabi Allah Swt ngasokani bulan tera’, maka tera’. Namung enalekanah ngasokani bulan petteng, maka paste petteng.

Muslimin Muslimat rahimakumullah, 

Akadhiye se edhabhuwaghi sareng Rasulullah Saw. dalem hadits e attas, enalekana abdhina sareng ajunan sadhaja ngoladhi da’ ka badanah gharanah, sae gharana bulan otaba gharana are, maka e sonnattahi alaksana’aghi shalat karena badanah gharana. Maka alaksana’aghi shalat sonnat karena badanah gharana aropa’aghi settong ibadah se raja ghanjarannepon karana epakon langsung sareng Rasulullah Saw.

Para Jama’ah rahimakumullah, 

Rasulullah Saw. jhughan adhabu e dalem hadits laen se jhughan e riwayattaghi sareng Imam Bukhari:

Arteepon: “Saongghuna (gharana) are sareng bulan aropa’agi duwa’ tandha dari tandha-tandha kakobasa’anna Allah Awt. Kaduwana tak daddi gharana karena sedhana otaba lahirra settong oreng. Maka lamun sampean kabbhi ngoladhi da’ kakdissa’ (gharana), maka adzikkera, ban atakbira, ban ashalata, ban ashadaka’ah sampean kabbhi.” (Shahih Bukhari, 1044).

Maka dari hadits kakdinto, enalekanah gharana, abdhina sareng ajunan sadhaja tak namung epakon ashalat, namung epakon jhughan kaanghuy adzikker, atakbir tor asadakah.

Para jama’ah rahimakulullah,

Samoga’a badana ibadah seealaksanaaghi abdhina sareng ajunan sadhaja daddhiya ibadah se katarema mongghu Allah Swt. Tor badanah gharanah akadhiya malem mangken kakdinto, bisa namba rassa takok kalaban alaksana’aghi sadhaja parentana Allah Swt tor ajhaui sadhaja lang-langannepon tor jhugan samogha’a bisa nambai kaimananna abdhina sareng ajunan sadhaja da’ ka Allah Swt. Se saengghana abdhina sareng ajunan bisa ongghu-ongghu daddi kabula se semma’ da’ ka Allah Swt. Aaminn.